29.8.12

Töffarar

Stelpurnar mínar eru töffarar. Þær vilja orðið miklu frekar hlusta á Alice Cooper, Foo Fighters og allskyns gæðarokk frekar en barnatónlist.

Áðan lumbraði sú eldri að vísu á mér með dúkkusæng því hún vildi ekki hlusta á Death Cab for cuite, hedur bara býflugulagið (no rain með blind melon). Þurfum að taka þetta eitt skref í einu :P

25.8.12

Kvef

Að sjálfsögðu náði ég mér í hor í nef eftir að hafa eytt/nýtt viku á leikskóla. Ennisholur stíflaðar eins og fucked-up crazy-ass weirdo beaver hafi gert stíflu í nefinu á mér. Alveg magnað hvað þetta getur verið mikið pirrandi, sérstaklega miðað við hvað þetta er í raun og veru lítið mál.

24.8.12

Datt!

Eða fallin. Dagur sjö af engu nema hnetum, fræjum, baunum, grænmeti og ávöxtum. Ég er svo þreytt og orkulaus eitthvað, þrátt fyrir að hafa gert mitt allra besta til að halda uppi hitaeiningum, að þetta getur ekki verið sniðugt. Rétt í þessu fékk ég mér ristað brauð með smjöri og osti, dætrum mínum til samlætis. Þetta var besta ristaða brauð í öllum heila heiminum.

23.8.12

Spy-d-uhh

Ég fatta ekki alveg köngulóafóbíu. Bíddu, leyfið mér að umorða þetta. Ég fatta ekki alveg köngulóafóbíu á Íslandi. Í Ástralíu myndi ég pottþétta skylja köngulóafóbíu. Ef köngulóin er orðin eitruð eða það stór að hún gæti unnið þig í slag með fimm fætur bundnar fyrir aftan bak, þá er óttablandin virðing æskileg og skiljanleg.

Þegar köngulær eru á stærð við smartís og ekki líklegri til að valda meiri óskunda en að spinna vef í andlitshæð... hví þá öskur og drama upp á bak?

21.8.12

Aðlögun

Junior Junior er í leikskólaaðlögun. Hún er að verða 15 mánaða og hefur fram að þessu bara verið heima með mér. Eða ég heima hjá henni. Næsta mánudag byrjar hún svo í leikskólanum eins og almennur leikskólaborgari. Kannski 6,5-7 klst vinnudagur hjá henni eða svo. Hinn harði heimur þar sem það þarf að vera tilbúinn til að berjast fyrir dóti og lemja með skóflu ef svo ber undir. Sem betur fer er stóra systir ekki langt undan og eflaust tilbúin til að lumbra á börnum með skóflu fyrir hennar hönd ef svo ber undir.

Það er örugglega gott að vita að það sé einhver til sem lítur svo á að enginn megi lemja þig með skóflu nema hún sjálf.

20.8.12

Baunir

Það er hreinsun í gangi. Ég held það sé betra að segja það heldur en detox. Detox hljómar eitthvað svo buzzwordlega að mér finnst eiginlega að það ætti að vera "Group" á eftir því. Eða Holding. Sjálfbært detox.

Þetta er líka ekki beint detox. Meira tími til að leyfa líffærum að jafna sig.

Tvær vikur af engu nema grænmeti, ávöxtum, fræjum, hnetum og baunum. Stundum fer meltingakerfið á mér í eitthvað rugl og þetta á víst að hjálpa til með að hreinsa ristil og lifur og ekkert nema hamingja og gleði í framhaldinu. Okay, það er amk kenningin og það er alveg þess virði að prufa fyrst þetta eru bara tvær vikur. Segi ég núna sko. Bara. Kem með update þegar ég er komin lengra í ferlinu. Dagur þrjú. Fram að þessu hefur þetta verið merkilega auðvelt, en ég get ekki sagt að maturinn sem ég sé að borða sé voðalega spennandi. Allar uppskriftir eru með frekar mikinn svona "þetta er alveg eins og alvöru matur.. for reals!" brag á sér. Er ekki alveg að botna í fólki sem getur staðið í þessu til lengri tíma, sérstaklega ef það sleppir mjólkurvörum, eggjum og kornmeti eins og ég er að gera núna.

Baunir hafa alltaf verið mér dálítið erfiðar. Mér finnst eitthvað ógeðsleg áferð á þeim og á erfitt með að koma þeim niður í því magni sem ég tel nauðsynlegt til þess að þetta prógram sé ekki beinlýnis óhollt, svona fyrst þetta er eini próteingjafinn í boði. Ég komst að því núna í hádeginu að baunaboozt er alls ekkert svo klikkað, þó það hljómi verulega viðbjóðslega. Ég jukkaði saman slatta af linsubaunum, smjörbaunum, banana, avocado, frosnum ávöxtum og smá hreinum ávaxtasafa og það var vel drekkanlegt. Skárra að drekka þetta helvíti en að borða. Heh.. Baunaboozt í tvær vikur. FML.

Svona fyrir utan það hefur gengið nokkuð vel. Ég reyni að spá dálítið í næringasamsetningu og hvernig ég geti haldið kaloríum uppi. Að minnsta kosti fór ég í crossfit í morgun og fannst ég ekkert vera orkulausari en venjulega. Spurning hvernig þetta þróast..

19.8.12

Wft skammtímaminni? Já og litir. Og viðarvörn.

Hér er því slegið fram að nú muni hefjast pósk-á-dag átak og svo gleymi ég því bara um leið. Fail.

Annað sem ég hef alveg klúðrað í sumar er að viðarverja pall, grindverk og garðhúsgögn. Ég hef það fyrir satt að margir séu að standa í þessu á vorin, en ég er fyrst að spá í þessu núna þegar það er næstum því komið haust. Það er svo mikið næstum því komið haust að yfirspennt laufblöð eru búin að skipta litum og.. (Þessi setning er ekki lengri eða betur samin þar sem að vatnið á linsubaununum sem ég var að sjóða var farið að bubblast upp úr pottinum og út um allar trissur. Sagan á bak við þessar linsubaunir gætu verið tilefni til annars pósks..)

Fyrir rúmlega 2 vikum drifum við helmingurinn loksins í því að þrífa pallinn og í kjölfarið bar ég á hann. Svo kom rigning. Það ringdi í tvær vikur og ég hélt það væri komið haust. Viðarvarnarfatan, sem var náttúrulega enn nánast full, horfði á mig ásakandi augum. Nú var bara komið haust og við tæki rigning og snjór í marga, marga mánuði.. og grindverkið algjörlega óvarið fyrir grimmum náttúruöflum Ártúnsholtsins.

Sem betur fer sá Veðurguðinn, hann Veðurguð aumur á mér og skellti smá auka sumri svona aftast. Ég komst loksins í að bera á grindverkið með ipod í eyrum og sól á himni. Svo var komið að húsgögnunum.

Það er ekki nema svona ár síðan að við Einar áttuðum okkur á því að við værum með smekk. Við vorum nefnilega á tímabili að versla húsgögn og annað miðað við annara manna og kvenna smekk. Allt í einu áttuðum við okkur á því að massívt eikarborðstofuborð og svartir leðurborðstofustólar með eikarfætur væru bara hreint ekki okkar poki elskan. Við seldum næstum öll stofuhúsgöngin, létum smíða hringborð í staðinn og keyptum okkur stóla í lit.


Litur! Það er sko málið. Auðvitað komst ég að því að það yrði að vera sæmilega smekklegur í litavali og fyrir svona ekki-arkítekta-plebba eins og okkur þýðir það að takmarka sig við nokkra liti. Við erum aðallega í grænum og fjólubláum út af afskaplega flóknum innanhússarítektúrapælingum. Because of reasons. Jebbjebb.


Ég smellti meira að segja í "lúðalistaverk" með grænum og fjólubláum og málaði hvíta blómapotta og ljósaskerma svo þær væru í réttum lit. Við erum með talsvert fleiri græna og fjólubláa hluti í stofunni.



En það er náttúrulega bara stofan. Útihúsgögn eru í allt öðru domaini og því önnur lögmál sem gilda. Vúhú! NÝJIR litir! Í gærkvöldi og í morgun var ég loksins að vinna með einhvern annan lit en brún-glæran (er brúnglær til? Þetta var amk c.a. brúnglært). Það er náttúrulega illa glatað að vera loksins að klára þetta svona seint á sumrinu, en það verður amk gaman að horfa á fallega gult borð og bláa stóla út um gluggann, vitandi að allt saman sé tilbúið fyrir veður og vinda. Okay.. kannski ekki vinda. En veður!



16.8.12

Annað átak

Rétt í þessu kíkti ég á póskið mitt og komst að því að ég skrifa aldrei neitt. Aldrei aldrei. Ég er að spá í að taka annað "pósk á dag í mánuð átak". Held það hljóti bara að gera konu gott að skrifa öðru hvoru.

Öðru hvoru.

Haha.

29.6.12

Öskjuhlíðarstuð


Mamma og pabbi fengu Ernu (1 árs í Séð og Heyrt stjörnu) lánaða í smá quality time, svo að Sara (2ja og hálfs) gæti fengið smá quality time ein með okkur Einari. Tvær flugur og allt það.

Við vorum búin að þvælast eitthvað og enduðum svo á gönguferð um Öskjuhlíðina og stuði í Nauthólsvík. Á röltinu í Öskjuhlíðinni fannst okkur hún vera farin að ganga frekar asnalega og ég spurði hana hvort hún þyrfti að pissa. Hún viðurkenndi það og svona fyrst við vorum í miðjum óbyggðum og í ljósi þess að það sé ekki alltaf of langur fyrirvari á svona tilkynningum, ákvað ég að vera sérstaklega ósmekkleg og fara bara með hana út af stígnum og á milli einhverra runna til að pissa.

Þegar við vorum svona nokkurn veginn komin í hvarf lyfti ég barninu upp í sómasamlega klósettstellingu og sagði henni að láta vaða sem hún og gerði. Ekki piss. Tvö stykki Öskjuhlíðar-offroading-kúkar. Æðislegt. Sem betur fer var ég með pakka af snýtubréfum í töskunni, svo ég gat þrifið barnið og svo sá ég þann kost vænstan í stöðunni að fjarlægja sönnunargögnin með fleiri snýtubréfum. Ég meina, mér finnst það alveg verulega ógeðslegt að sjá hundaskít sem hefur ekki verið tekinn upp, svo ég bauð nú ekki í það ef einhver bláeygður sakleysingi myndi lenda í því að stíga í eitt eða tvö stykki mannara í óspilltri náttúrunni (eða eitthvað svoleiðis).

Ewwewweww.. Klígjugjarna ég er sko farin að gera allskonar hluti sem ég hefði aldrei talið mögulega áður en ég eignaðist börn. Þau gera okkur af betri manneskjum hef ég heyrt. Ég hefði amk ekki séð fyrir mér að ég væri röltandi um með kúk í bréfi fyrir nokkrum árum síðan.

Sem betur fer hélt ég haus og mundi eftir því að við hefðum verið ný búin að ganga framhjá nokkrum bekkjum og ruslatunnu, svo ég stormaði á milli runna og beint í áttina að áðurnefndri tunnu með síli og eiginmann á eftir mér. Þegar þangað var komið sá ég að maður var að setjast niður á bekk við hliðina á ruslatunnunni. Fuuuu. Ég setti upp besta casual "ég er bara að henda smá rusli, nevermind me" svipinn minn, þegar Sara brýst fram á milli runnanna.

Sara: Mamma! hvar er kúkurinn?

"Meira fuuuuu" hugsa ég og ákveð að láta á engu bera. Kannski heldur maðurinn að ég sé bara ein af hetjum samtímans sem taki upp hundakúk á víðavangi.

Sara: Mamma. Ég þarf að kúka meira

...þar fór það.

Við stormuðum með barnið á veitingastaðinn Nauthól þar sem hún kláraði að gera sínar þarfir eins og náttúran gerði ráð fyrir... í klósett.

Spurning um að fara að bæta hundaskítspokum við í töskuna mína..


15.5.12

Brúnt



Aðeins að uppfæra gervigreindina. Ég er búin að vera að máta "dökkljóst" hár síðustu mánuði og færði mig svo á næsta level í gærkvöldi. Eða niður um level.. Pakkalitur nr. 6 í staðinn fyrir nr. 7 eða eitthvað svoleiðis. Kemur í ljós hvernig þetta gengur.

9.5.12

Vesó

Piff. Hvað er Öryggismiðstöðvarfólk að boða komu sína kl. 9:30 um morguninn til að taka eitthvað once-over? Veit þetta lið ekki að ef fólk býr á tveimur hæðum, þá er bara annarri hæðinni haldið sæmilega gestavænni og draslið geymt á hinni? Ég þurfti að skutla krílinu í rimlarúmið sitt og múta henni með snuði og dóti, þjóta svo í að moppa yfir og henda öllu sjáanlegu drasli inn í hjónaherbergi og loka. Ahh ég fékk alveg svona unglinga-flashback þegar ég skutlaði drasli undir rúm og lét svo rúmteppið hanga fram fyrir.

3.4.12

Zumba á nærbuxunum

Ég var að eignast nýja tölvuleik. Ég var sko alveg komin í stellingarnar með að prufa hann og þá tók sílið aldrei þessu vant upp á að vera með vesen við það að sofna. Eiginmaðurinn stakk af í körfu (hann er basket case 1x í viku sko) og eftir sat ég með eitt stykki barnapíutæki sem spilaði eitt stykki tveggja ára barn syngja "1,2,3 áfram Latibær", kalla "ÉG er Glanni Glæpur" og fara með leikþætti og klósett-tengd gamanmál.

Allt í einu ranka ég við mér og geri mér grein fyrir því að það hefur ekki heyrst svo mikið sem múkk í barninu í svolítinn tíma, klukkan orðin miklu meira en ég sá fyrir mér að hún yrði þegar ég væri á zumbandi siglingu og ég ekki búin að skipta yfir í æfingaföt. Ég greip til þess ráðst að draga fyrir gluggana og strippa niður á gammó (ég er bara ekki tilbúin til að segja "leggings". Mér finnst það ennþá vera of Þjóðverjalegt. Hvað næst? Handy í staðinn fyrir GSM síma? Hmmha?) og bol. Gammó reyndust svo vera of sleypar fyrir wii-remote mjaðmabeltið sem fylgir, þannig að ég endaði á nærbuxunum í zumbandi zumbí-rarí-rei. Pfff.. þetta hefur ekki verið falleg sjón og ég vona innilega að það séu engar faldar myndavélar hérna svo ég endi ekki eins og Star Wars kid.

En aftur að Tímon og Zumba.. Nærbuxur eða engar nærbuxur (og jú, til að koma í veg fyrir frekari óþægilegar "mental pictures", þá voru vissulega nærbuxur) þá er þetta alveg öskrandi snilld, allavega svona miðað við fyrstu zúmbun. Ég ákvað að byrja hægt, svona fyrst að klukkan væri orðin margt og vegna þess að ég hafði aldrei prufað zumba áður og valdi "short class, low intensity".

Það var að vísu einhver valmöguleiki að láta kenna þér skrefin á ultra hægum hraða en hver nennir því eiginlega? Ég demdi mér bara út í þetta og komst að því að "low intensity" þýddi sko ekki að þetta væri eitthvað hægt. Á tímabili var ég farin að sjá eftir því að hafa ekki byrjað í aula-hjálpadekkja-mode og látið kenna mér, en zumbaði bara áfram blindandi og tók fljótlega upp stefnuna að ef ég væri ekki viss, þá bætti ég bara við auka mjaðmahnykkjum. Það bar alveg ferlega góðan árangur og ég endaði með 3 stjörnur af 5 mögulegum og einkunina "zumba expert" eða eitthvað álíka fyrir wii-rkoutið. Zumbi fjörálfur?

Ég sé fyrir mér mikið zumba í minni nánustu framtíð.

30.3.12

Fyrir vin minn, litla Kínverjan

Ég held ég þekki engan Kínverja lengur að vísu. Þegar ég var í DTU vann ég verkefni með tveimur stelpum frá Kína, en ég held að þar með sé það upp talið.

Það sem ég vildi samt sagt hafa er að það er ekki nógu mikið af gulum fötum til í heiminum. Gulur er glaður og fallegur litur. Þegar ég var lítil var gulur meira að segja uppáhalds liturinn minn. Það er gaman að halda upp á gulann því að á sumrin er allt morandi í túnfíflum og sóleyjum út um allar jarðir. En hvað sem að lagið segir, þá er "góða appelsínan" sko ekki gul. Ekki nema að "góða appelsínan" sé sítróna sem sé að villa á sér heimildir.

Í gær breytti ég gulum suttermabol í lítið gult pils með gulu blómi og í gult hárband. Saumavélin mín var svo hissa þegar ég sótti hana upp á háaloft að hún pissaði tvinna út um öll gólf.

Nú á frumburðurinn allavegana gul föt og mætti glöð á gulan dag á leikskólanum. Þess má geta að þetta er í þriðja skiptið sem barnið mætir í pils eða í kjól á leikskólann. Hin tvö tilefnin voru afmælið hennar og litlu jólin. Ég er ekki stuðningsmaður þess að senda börn í kjólum og pilsum á leikskólann.. Skraaaambinn nei.

28.3.12

Tannsi

Ég fór til tannlæknis áðan. Það er eitthvað svo brjálæðislega vandræðalegt við að fara til tannlæknis. Ekki svona félagslega vandræðalegt, heldur meira svona... næstum því alveg á hvolfi með gapandi munninn, hendur af hálf ókunnugri manneskju upp í þér og þurfa öðru hvoru að svara spurningum með "agghaaaa" eða "hnnnrrrrrghh".

Annars er ég gölluð. Það er alveg slatti síðan ég tilkynnti það hérna. Ég er sem sagt með tvær barnatennur, hlýtur að vera þessvegna sem ég er forever young. Eða eitthvað svoleiðis. Það eru engar fullorðinstennur undir. Þær eru samt ekkert tiny tiny eða neitt. Fæðingargalli. Svo kemur í ljós áðan að ég er líklega með frekari fæðingargalla - engir öftustu jaxlar í efri góm. Stuttu fyrir þetta hafði tannsinn tilkynnt mér að ég þyrfti líklega að láta taka þessa í neðri gómi, svo ég get ekki verið annað en sátt að hinir muni aldrei koma. Aldreialdrei. ALDREI!

En ég meina, enginn er fullkominn svo það er ekki slæmt að vera bara með það svart á hvítu á röntgenmynd hver gallinn hjá mér er. Jessörr.

25.3.12

Náttfatapartý

Tæplega tveggja og hálfs árs grallaraskott á náttfötum, 10 mánaða (í dag) grallaraskott á náttfötum, mamman á náttfötum og Sól dúkka á náttfötum. Hafragrautur og lýsi á línuna og svo kannski vagnalúr fyrir yngri dótturina og jafnvel Skoppa og Skrítla fyrir þá eldri. Sunnudagskósí.

"Þegar ég var lítil, þá var ég hrædd við jólasveininn" sagði eldri dóttirin í fyrra dag. Það er sko ekkert smá sem er hægt að stækka á 3 mánuðum. Annars kom í ljós í gær að Skoppa og Skrítla eru svolítið eins og jólasveinninn. Fínt concept, en afskaplega hræðilegar í persónu.

14.3.12

Leitileit

Ég er að leita að blaði sem er búið að vera að þvælast fyrir mér svo gott sem á hverjum degi í svona 2 mánuði. Í dag þarf ég á því að halda og það er hvergi sjáanlegt. Típííííískt

13.3.12

Kvefuð

Ég er með allsvakalega stíflað nef. Það er ekkert annað að angra mig, svo ég lifi þetta alveg af, en vandamálið er að ég nenni ekki að borða neitt. Til hvers að borða ef ég finn ekkert bragð? Pff.

7.3.12

Eldhúsið

Ég gleymdi alltaf að monta mig af leikeldhúsinu sem ég smíðaði úr 2 náttborðum fyrir hana Söru í 2ja ára afmælisgjöf.


Ég held að ekkert dót hafi verið eins mikið notað á þessu heimili og þetta eldhús og mikið afskaplega var gaman að búa þetta til. Það eina sem ég hef út á þetta allt saman að setja er að núna er ég alltaf með einhverja óstjórnlega þörf til þess að smíða og ég á engan bílskúr. Það er ekki endilega kúl að smíða inni í eldhúsi og þurfa að vera með ryksuguna á lofti eftir hvert sag.

Ég á mér draum

Lengi hefur blundað í mér sá draumur að mála kastalaveggi í einhverjum öðrum lit en þessum beinhvíta sem varð fyrir valinu áður en við fluttum inn. Ókay.. kannski ekki háfleygasti og göfugasti draumur sem blundað hefur í höfði drottningar, en alveg pottþétt háfleygari og göfugri en sumir. Einu sinni dreymdi mig t.d. um að eignast fjaðraskraut um hálsinn. Hvað er það? Allavega ekki háfleygt sko.

Það er samt eitthvað ógnandi við að velja málningu í lit, svo fram að þessu þegar draumurinn hefur pikkað hikandi í öxlina á mér hef ég trampað á honum og sent hann aftast í röðina. Ég veit ég var náttúrulega bara að hvetja hann þegar ég málaði gulan sand og bláan sjó inn í barnaherbergið og passaði mig að mála ekki óléttubumbuna í leiðinni. Núna hefur kvikyndið verið að sækja í sig veðrið og þegar ég reyndi að senda hann aftast sagði hann...

NEI!

Ég ákvað þá að reyna að drífa mig í því að finna út úr þessu, því ekki get ég haft snarklikkaðan og upp-buffaðan draum hoppandi á öxlinni á mér í tíma og ótíma. Ég var svona eiginlega búin að ákveða að mála einn veggstubb og einn stóran vegg í stofunni til að byrja með og helst í sitthvorum litnum. Svo horfði á þennan stóra vegg í stofunni og hugsaði "ah.. þessi væri flottur grænn. Mér finnst grænn fallegur litur". Þrátt fyrir að vera nokkuð viss um að ég hafi aldrei rangt fyrir mér, ákvað ég að það yrði kannski best að fara út í smá rannsóknarvinnu til þess að ég myndi ekki vera að gerast sek um hroðaleg innanhússarkítektaamatöramistök (<-- bjó til þetta orð sjálf. Takkfyrirtkkfyrir. Mér finnst þessi tvö "a" í röð þarna gefa þessu svolítið finnskan blæ. Finnskt þér ekki? H0h0). 



Eftir gífurlega heimildasöfnun og miklar rannsóknir hef ég komist að því að það virkar ekki alveg þannig að kona getur bara horft á vegg og hugsað um lit sem henni finnst fallegur og málað vegginn í svoleiðis lit. Neineineinei..  Þó svo að einhver litur sé rosa fallegur, passar hann kannski alls ekki heima hjá þér. Eða í þessu tilfelli mér. Liturinn á veggjunum er víst það sem á að ákveða síðast. Fyrst þarf að taka mið af litum á gólfi, litum á húsgögnum og fylgihlutum, lýsingu o.fl.

Nú snúa gluggarnir í stofunni t.d. í suður og það er mikil náttúruleg lýsing í stofunni stærstan hluta ársins. Þá er víst betra að mála veggina í köldum lit. Sá kaldi litur sem liggur beinast við er grár. Það eru steingráar flísar inni í eldhúsi sem sjást úr stofunni og eins valdi ég steingrátt teppi á stigann á sínum tíma. Einn af borðstofustólunum okkar er líka grár (6 stólar í 6 litum). Sko mig! Búin að beita allskonar innanhússarkítektapælingum. Veggstubbur! Þú verður líklega grár.

Það kemur víst flott út að poppa gráan upp með bjartari lit. Þeir litir sem komu til greina með gráum eftir að hafa skoðað borðstofustólalitapallíettuna (bjó þetta orð til líka. Ég ætti kannski að leggja þetta fyrir mig) voru gulur, fjólublár og grænn. Gulur er hlýr litur, svo honum var hent út af borðinu vegna áðurnefndar lýsingar og þó svo að fjólublár geti verið fallegur finnst mér hann vera meiri svefniherbergis- og baðherbergislitur. Þá var eftir grænn. Já.. ég er sem sagt að spá í að mála stóra vegginn í stofunni grænan. 

....bíddu nú aðeins eitt augnablik. Grænan? 

Getur það verið að ég sé með innanhússarkítektarblóð í æðum mér? Bara svona náttúrutalent þegar það kemur að innanhússarkítekt...imsa? Það getur bara vel hugsast. Það eina sem heldur mér frá því að ganga að því sem vísu og fara að skipta um starfsvettvang, er að ég er ekki aaaalveg búin að negla niður hvor veggurinn á að vera grár og hvor á að vera grænn. Já.. eða tala við eiginmanninn og greina honum frá rannsóknarvinnu og niðurstöðum. 

Ég sé allavega fyrir mér græn og grá litaspjöld í náinni framtíð (hva! Bara spádómsgáfa líka.. Hún getur allt þessi stelpa!).

6.2.12

Orð sem venst ekki..

"Mömmuhjartað". Ég hef heyrt þetta orð oft í gegnum tíðina og mér finnst það ennþá eins ferlega bjánalegt og þegar ég heyrði það fyrst. "Mömmuhjartað var nú svolítið stollt"... "Mömmuhjartanu var bara illt". Fyrst hélt ég að notkunin á þessu orði væri einangruð við lið í einhvejru undarlegu költi, en síðan þá hafa allskonar kvenmenn sem ég hélt að væru sæmilega heilir á geði farið að sveifla þessu fram eins og þetta meiki sense. Geta konur ekki bara sagst vorkenna lösnum börnum sínum eða að þær séu stoltar af erfingjunum án þess að þurfa að taka hjartað í sér út fyrir sviga og skella "mömmu" fyrir framan og tala um það í þriðju persónu. Þetta er eins og þegar litlir krakkar eru að leika sér með bangsana sína og segja "bangsa langar í kex" til að reyna að kría út kex án þess að sníkja. 

Ætli "pabbahjartað" mæti næst á staðinn? Eða "ömmuhjartað", "afahjartað", "systrahjartað", "frænkuhjartað", "vinkonuhjartað" eða "hundaeigandahjartað"? 

"Mömmuhjartað var rosalega stollt, en pabbahjartað var hins vegar frekar stressað. Afahjartanu var skemmt". 

Póskhjartanu finnst þetta glatað. 

3.2.12

Ég opnaði banana vitlausu megin

Nei ég ætlaði ekki að segja "röngu megin". Þetta var alveg akkúrat það sem ég ætlaði að segja. Í gegnum tíðina hafa ákveðnir aðilar reynt að halda því fram að það sé betra að opna bananan vitlausu megin. Rétt í þessu var ég að fá mér banana og rak allt í einu minni til þess að ein ástæðan fyrir því að fólk heldur því fram að þessi geðveiki sé hnén á býflugunni og náttföt kattarins, sé að þá séu engar bananalínur eftir á bananananananaanum eftir aðfarirnar. Ég er sko innilega ekki banananalínuaðdáandi og blóta hverri einustu til dubstep lags um leið og ég ríf hana af. Mér er svo illa við bananalinur að ég var meira að segja tilbúin til þess að prufa að opna banana vitlausu megin til að losna við þær.

Hey.. getiði hvað. Það er lygi! Bananalínurnar eru bara samt á banananum þó svo að kona fari niður á þetta level.

LYGI!

Ég opnaði banananananananananann asnalegu megin til einskins.

30.1.12

Faaaallin

Fallin á sykurleysinu. Það eina sem togaðist ofan í mig yfir allan gærdaginn var ein poweraid flaska, skipt niður á svona eins og 12 klst. Það er sykur í poweraid. Usss :)

Er að spá í að láta eins og þetta hafi aldrei gerst.

29.1.12

Ein heima

Bæði börnin í pössun og við eiginmaðurinn ein heima í fyrsta skipti í fjölda mánaða. Ákváðum að skipta hæðunum á milli okkar svo hvort okkar um sig hefði eigið klósetti og þyrfti ekki óvart að gubba á hnakkann á hinu. Gubbupest...... Glorious

28.1.12

Nachos

Í gær fékk ég einhverja gífurlega þörf fyrir að sukka yfir Sherlock þætti/mynd/whaevs. Ég fékk einhverja vitrun um að nachos getur sko verið hveiti- og sykurlaust sukk, en það þarf að lesa aftan á pokann til að vera viss. Sumar týpur, eins og t.d. Doritos eru frá USA (eða er það ekki örugglega?) og þá væri það á móti lögum að setja hvorki sykur né HFCS í. Ég komst líka að því að það er möguleiki á að kaupa salsasósu og ostasósu án þess að það sé búið að setja sykur út í, svo ég bjó mér til ofurídýfu með því að jukka áðurnefndum sósum saman við mozzarella ost og setja inn í ofn *homerslef*. Sumir eru þeim ranghugmyndum gæddir að það eigi að nota rjómaost en ekki ostasósu. Veit ekki alveg hvaðan það kemur.

Allavegana. Ég komst að því að Einar borðar nachos sem snakk og vill helst ekkert vera að blanda neinum sósum eða ídýfum í málið. Ég nota hins vegar nachos sem ætilegar skeiðar til þess að skófla upp í mig ídýfum. Noooom nachos-ídýfur.. Guacamole, salsa, ostasósa og svona ofnajukkisósa.

Einhverra hluta vegna hef ég aldrei komist í sama gír með old school kartöfluflögurnar. Fyrir það fyrsta finnst mér þær ekki eins góðar og svo eru mæjónessósurnar ekkert að gera eins gott mót.

27.1.12

Ofurmömmufílíngur

Stundum, fæ ég smá ofurmömmutilfinningu þegar ég geri eitthvað sem fólki almennt finnst eflaust ekkert sérstaklega merkilegt á blaði og dagmömmum þætti bara hægur dagur. 2ja ára sílið er heima í dag þar sem hún var lasin í gær. Núna síðasta hálftímann er ég búin að klára að elda sitthvorn hádegismatinn fyrir þær, mata þessa 8 mánaða, syngja, brosa yfir því hvað ég eigi fyndin og skemmtileg börn, hrósa fyrir duglegheit og kurteisi, þrífa báðar, skutla þeirri eldri í rúmið sitt, slökkva ljósið, kveikja á slökunartónlist, kyssa haus og labba út.. Skutla svo þeirri yngri í rúmið sitt, slökkva ljósið, kyssa haus og labba út og þær voru báðar sofnaðar áður en ég var einu sinni byrjuð að labba niður stigann.

Ef svo mikið sem önnur þeirra hefði farið að kvarta yfir því að vera sett í hvíld núna eða hefði ekki borðað vel eða verið með vesen hefði ég eflaust ekkert verið í ofurmamminu. Það virðist sem sagt vera að það sé ekki endilega það sem mamman gerir, heldur það sem börnin gera sem kemur af stað ofurmamminu. Það er kannski bara eðlilegt.

26.1.12

Meiri snjór og "ekta súkkulaði"

Mikið held að það væri ofboðslega gaman að vera svona 8 ára og eiga góðan kuldagalla núna. Ég myndi fara út með skóflu og snjóþotu/stigasleða og ekki koma inn aftur fyrr en mér yrði dröslað inn með valdi. Vonandi kemur aftur svona mikill snjór einhvern tímann þegar stelpurnar mínar verða aðeins eldri. Þá verða sko grafin göng út um allan garðinn hjá okkur og gott ef það verður ekki kakó eftir á ef stelpuskottin munu hafa smekk fyrir svoleiðis skramba, þó svo að hvorki ég né E drekkum svoleiðis.

Einhverjar vísbendingar eru reyndar uppi um annað, amk hjá frumburðinum. Þegar litlu jólin voru á leikskólanum var hátíðardagskrá allan daginn m.a. með hátíðarmatseðli í hádeginu og smákökum og ekta súkkulaði í "nónhressingunni". Þegar ég var svo að yfirheyra hana um þetta eftir á og spurði hana um súkkulaðið sagði hún "Nei. Ég víldekki". Kannski er þetta bara í geninun, þó svo ég hafi fyrir satt að ekta súkkulaði sé sko allt annar pakki en kakó. Amk var reynt að ljúga þessu að mér þegar ég var lítil. Einhverra hluta vegna virðist fólk bara ekki geta komið hausnum á sér utan um þá staðreynd að einhverjum finnist þetta ekki gott

Ég: Nei, ég vil ekki kakó
Ættingjar: Þetta er ekki kakó. Þetta er EKTA súkkulaði. Smakkaðu þetta, þetta er rosalega gott
Ég: En ég vil ekki...
Ættingjar: ... og svo er þetta í svo flottum bollum *hella EKTA súkkulaði í flottan bolla og rétta mér*
Ég: *einn sopi og gretta* En ég VIL ekki...
Ættingjar: Það vantar bara RJÓMA út í (sagt eins og að rjómi sé það besta sem nokkur gæti óskað sér að drekka)

Svona í ellinni hef ég stundum látið mig hafa kurteisis kakó eða meðvirknis EKTA súkkulaði, t.d. þegar við höfum mætt í heimsókn einhvert og gestgjafinn hefur sloppið inn í eldhús og skellt í könnu af þessum skramba. Eiginmaðurinn á nefnilega tromp uppi í erminni. Hann drekkur kaffi, á meðan ég er þeim eiginleika gædd að hafa fæðst með bragðlauka. Ég þarf þá að taka kúluna fyrir hönd okkar hjónanna svo eldhúskuklið hafi ekki verið til einskyns. Ég skil eiginlega ekkert í mér að gera þetta. Árið er nú sæmilega nýtt og ferstk ennþá. Spurning um að slá fram nýársheiti að hætta að drekka meðvirknis kakó. Já, því ekki?

24.1.12

Snjór

Væri hrifnari af þessu heeeeelvíti ef þetta þýddi ekki að ég væri alltaf svo gott sem snjóuð inni :P Hef ekki mikið komist í vagnalabbitúra það sem af er þessu ári og sjaldan geta sótt sílið á leikskólann þar sem það er ekki vagna/kerrufærð og ég vil ekki hafa smásílið í burðarpoka ef ég gæti dottið í hálku. Puff.

Eh.. ég ætti kannski að taka fram að pabbi hennar sækir hana á leikskólann. Hún er ekkert búin að hanga þar síðan í byrjun mánaðarins :)

23.1.12

Sykurlaus

Nú er ég búin að vera hveiti-, sykur, og rauðakjötslaus í næstum 3 vikur og það er eiginlega bara ekkert mál. Ég á reyndar alveg pottþétt eftir að setja rautt kjöt aftur inn í lok mánaðarins... en kannski ekki unnar kjötvörur. Ædönnó. Ég bý til mitt eigið muslí og mitt eigið brauð (enda ekki hægt að fá brauð úti í búð sem er ekki með neinu venjulegu hveiti) og það er miklu betra á bragðið því ég hrúga öllu sem mér finnst gott í það. Ég er að borða milljón sinnum bragðbetri og skemmtilegri mat. Ég held líka að málið sé að ég er ekkert að chilla í öðru. Er ekkert að þessu til að vera mjó eða neitt svoleiðis, þannig ég borða alveg smjör, ost og möndlur í vörubílsförmum og whatnot.

Í gær kom hins vegar fyrsta skipið sem ég hef átt virkilega erfitt með mig. Ég fór í afmæli þar sem var ein kaka, en annars bara heitar brauðrúllur (bestastabest), snittur með allskonar djúsí áleggjum, kex og ostar. Ég er sko þokkalega meira á heitubrauðrétta- og snittulínunni frekar en kökulínunni. Ég fékk mér nokkrar sneiðar af ostum og vínber, en glápti á brauðdótaríð með slef niður á tær. Ég endaði á því að sækja mér tvær snittur með reyktum laxi og skrapa lax, salatblað og papriku yfir á diskinn minn, en losa mig laumulega við brauðið sem hafði verið undir.

Ég reyndar lýg því. Alltaf þegar Einar opnar kókdós og það kemur þarna "ctsjjjjjjj" hljóðið, þá fæ ég vatn í munninn. Eftir að ég hef hins vegar náð mér yfir opnihljóðið, þá er ég svöl eins og Fonzie.

Strike two

Helginn rann einhvern veginn saman og ég bara fattaði ekki að ég hefði ekki póskað í gær. Nú þarf ég sko aldeilis að vanda mig næstu *fletta upp hvaða dagsetning er í dag*... átta dagana, svo ég þurfi ekki að lifa í eilífri skömm.

Hmm.. Ég er reyndar að ljúga. Ég myndi ekkert lifa í eilífri skömm. Ég myndi eflaust segja "úbbs" og halda svo bara áfram þar sem frá var horfið... en til að hlífa mér við þessu "úbbsi", þá þarf ég sko aldeilis að vera á tánum.

21.1.12

Útsölur

Fór í Kringluna og ætlaði að reyna að finna mér einhver föt. Labbaði út einum og hálfum klukkutíma seinna með afmælisgjöf fyrir guðsoninn og hörfræjaolíu fyrir smásílið. Grínlaust, ég fann ekki neitt. Ekki einu sinni eitthvað sem ég væri til í að kaupa en var of dýrt.. bara ekkert sem mér gæti mögulega langað í. Mátaði eitt pils og einn bol til málamynda, en pilsið reyndist vera ósiðsamlega stutt og bolurinn lét mig líta út fyrir að vera enn ólétta.

Ég held að internetið verði að koma mér til bjargar. Allt til á þessu interneti sko.

20.1.12

8 ára rokkari

Hún er æði!


Svo er líka fyndið að sjá öll "re" videoin þarna til hliðar þar sem að brjóstaskorur (held það sé ekki hægt að kalla þetta annað þegar það vantar 1/2 andlitið inn á mynd, en sést í öll brjóstin) eru að koma með sína gagnrýni á þetta.

Bóndadagur

Ég hélt í árlega bóndadagshefð og eiginmaðurinn fór í vinnuna í jakkafötum, með boxaða öxl og hamingjuóskir með að vera með typpi. Jakkafötin tengjast hefðinni okkar ekkert, heldur er árleg hefð á vinnustaðnum hans að karlmönnum sé boðið út að borða í hádeginu. Meira að segja ekki skemmdan mat. Það virðist vera að að einhver sé að misskilja eitthvað hérna..

Boost

Ég er ekki morgunmatarðdáandi. Í gegnum árin hef ég tamið mér að borða morgunmat, en hef alltaf átt hálf erfitt með það. Brunch hins vegar.... Þá værum við sko að tala saman.

Núna er ég komin með brilliant lausn. Ég fæ mér búst/boost/boozt/búúúhhhhszht í morgunmat. Það er æði. Ég sulla öllu þessu holla sem kona ætti að borða út í, eins og möndlumjólk, lýsi (með sítrónubragði sko), chia fræum, husk og spínati... svo set ég einhverja djúsí ávexti og whooolah. Morgunmatur sem ég er ekki að pína ofan í mig,  er bara með bústáferð, en ekki slepju chiafræjaáferð og smakkast eins og ávextir, en ekki lýsi og husk.

Mér líður alltaf eins og brjáluðum vísindamanni þegar ég set megagígaofurblandarann sem tengdó gáfu okkur í jóló af stað. Hann er svo megagígaofur að einu sinni gleymdi ég að setja lokið á og það sullaðist ekki einn dropi upp úr á meðan bústið var bústað. Sumarbústað. Hahaha.. fyndin ég.

Svo er það bara búst í glasi í vinstri og moka hirsigraut ofan í litla barnið með hægri. Bestun!

19.1.12

Regnboginn

Í gær nýtti ég kvöldið í að fara á vinnufund um gildi leikskólans hennar Söru, Regnbogans. Það var svona þjóðfundarbragur á þessu og foreldrar, starfsmenn og meira að segja foreldrar sem áttu börn sem eru farin af leikskólanum skiptust niður á borð, skrifuðu niður stykkorð, rökræddu og unnu með allskonar hugtök. Mikið fannst mér gaman að geta verið þátttakandi í þessu.

Þessi leikskóli er svo frábær að ég má vart mæla og öðrum foreldrum finnst það bersýnilega líka, þar sem að fólk berst um að fá að vera í foreldraráði og það eru varamenn í öllum hornum. Fyrst fannst mér pínulítið fyndið í haust að ekki-alveg-orðið-tveggja-ára barnið mitt væri að fara að vinna hópverkefni í stöðvavinnu, vera á tónlistarnámskeiði og svona, en svo er þetta bara allt saman algjör snilld. Litla sílið slær oft fram ansi háfleygum orðum sem hún hefur lært þarna og er afskaplega ánægð, glöð og sátt við leikskólann sinn.  Meira að segja maturinn er allur gerður frá grunni, brauð bökuð á staðnum o.fl. og Reggio Emilia stefnan sem farið er eftir þarna er frábær. Ég sé sko ekki eftir því að hafa sótt um þarna þegar Saran var 2ja mánaða og finnst alveg æðislegt að Ernan eigi eftir að leikskólast þarna líka í náinni framtíð.

Gleðigleði

18.1.12

Scourgify

Skrambinn. Virðist vera að töfrasportinn minn sé gerður til að saxa og mauka mat, en ekki til að galdra með.

17.1.12

Snjallt dót

Ég lagði snjallsímanum mínum núna um daginn því ég var komin með snjallan ipod (touch). Einhverra hluta vegna er android sími tæki sem er notað í skipulag, skoða veðrið, fréttir og minna sig á hluti, en ipod touch tæki sem er notað í leiki.... Magnað

16.1.12

Killing us softly

Talið við börnin ykkar, hvort sem það séu strákar eða stelpur. Fræðið þau og reynið að benda þeim á að stundum eru auglýsingar bjánalegar og senda röng skilaboð. Ef samfélagið breytist ekki, þá er amk hægt að  gera sitt besta til að börnin ykkar sogist minna inn í þessa vitleysu.



15.1.12

Bíjóóóóf

Við E fórum ásamt bróður mínum og guðsyni á nýjasta Hólmsarann. Hún var næstum eins góð eins og það er vont að það sé ekkert hlé og kona hefur drukkið 1/2 líter af kristal við byrjun myndarinnar.

Ekki það að þessi Hólmsari sé eitthvað eins og Hólmsarinn í bókunum. Hann er samt fínn.

13.1.12

Bara

*lemj í borð, lemj í borð KLAPP* lemj í borð, lemj í borð KLAPP* *lemj í borð, lemj í borð KLAPP* We will, we will rock you.. *lemj í borð, lemj í borð KLAPP*

11.1.12

Bakkabræður

Fyrir nokkrum vikum las ég Bakkabræður fyrir þessa smærri. Eftir að hafa straujað í gegnum þetta velti ég því virkilega fyrir mér hvort einhverjum hafi einhverntímann fundist þetta fyndið, kímið eða broslegt.. EVER.. eða hvort allir hafi bara viljað vera kurteisir.

10.1.12

Hýðislaust

Ég er að sjóða hýðishrísgrjón í snillar tupperware græjunni minni. Fór að spá í hvers vegna þau heita ekki bara "hrísgrjón" og hin "hýðislaus hrísgrjón". Það að vera með hýði er svona eiginlega normið hjá hrísgrjónum sko. Kannski er það af því að það þarf að sjóða hýðis í 45 mín og hin í 10 eða eitthvað, þannig að hrísgrjón hafa alltaf 35 mín í áróður eftir að það er búið að sjóða þau..

Fangi

Smásílið hefur ákveðið að vera fangi í dag. Amk sættir hún sig ekki við að vera neinstaðar annarsstaðar en í fangi..

9.1.12

Full keyrsla

Nú er allt að detta í rútínu eftir jólafríið og sílaveikindi, svo ég heimsótti einkaþjálfarann minn á ný eftir alltof langa pásu á meðan ég skutlaði þeirri minnstu út í vagn. Helvítið gjörsamlega keyrði mig áfram á akkúrat sömu ferð og fyrir "fríið" og sá sko ekki aumur á mér. Mætti halda að þetta væri einhver vél! Hefur enga sál þessi tölvuleikur sko.

8.1.12

Ég er búin að uppgvötva nýjan ofurkraft

Hann er að búa til mitt eigið muslí. Ef ykkur finnst það vera lame ofurkraftur, þá er það bara því þið hafið aldrei smakkað múslíið mitt!

7.1.12

Úbbs

Dagur fjögur og ég klúðra. Vandræðaleeeeeeeeegt.

Annars komst ég að því nýlega að möndlumjólk er awesome góð, grjónagrautur og lifrapylsa er lykillinn af hamingjunni hjá toddlerum og það þarf ekkert endilega að fara út úr bílnum sínum ef kona ætlar á skauta.

5.1.12

Svoooona stór

Ég efast um að það sé mikið af börnum sem óska þess heitast að verða meðalmanneskjur þegar þau verða stór. Ætli þau haldi ekki flest að þau eigi eftir að finna eitthvað stórkostlegt upp, vinna rosalegar hetjudáðir eða stjórna landinu. Völd sko, þau eru alveg málið. Munið þið þetta ekki? "Ef ég væri forseti í einn dag myndi ég banna að stríða og gera vörslu á nýrnabaunum refsiverðan glæp....." Skrítið af þessum forsetum hafi aldrei dottið þetta í hug.

Ég er að spá í nákvæmlega hvenær þetta breytist? Hvenær fólk rankar við sér og vill allt í einu frekar vera verkferlastjórar heldur en slökkviliðsprinsessur?

Ég ætlaði alltaf að verða rithöfundur þegar ég yrði stór. Alveg frá því að ég ákvað fyrst hvað ég vildi verða. Svo rokkaði það á milli rithöfundar og tölvunarfræðingar. Getiði hvort vann :)

Annars hefur verið áhersluskipting hjá mér svona í seinni tíð. Núna ætla ég bara aðallega að einbeyta mér að því að vera hamingjusöm frekar en að eiga risa stórt hús og verða forseti sem bannar nýrnabaunir. Ég er svolítið að spá í að reyna að sannfæra erfingjana líka um að það sé það besta til að verða þegar þær eru stórar.

4.1.12

Jólaáhlaup

Um jólin voru gerðar ítrekaðar árásir á meltingakerfið hjá mér í formi veislumáltíða, smákakna (heh. Fyndið orð) og sætinda. Á meðan ég var að gúffa í mig quality streetið sem eiginmaðurinn krefst þess að kaupa í 20 kílóa tunnu fyrir jólin, gerði ég mér allt í einu grein fyrir því að mér finnst það ekki einu sinni gott. Eða.. það eru nokkrir góðir molar, en restin er ekkert spes þó svo hún endi á því að vera étin. Það er ekkert smá tilgangslaust að borða vont nammi. Ég varð fyrir samskonar vitrun í fyrra í sambandi við Nóa konfektið. Það er barasta ekkert gott. Eins ljóst súkkulaði og það verður með allskonar yfirsætum kremfyllingum. Puh.

Já.. allavega. Ég týndi mér aðeins. Mér líður bara ekkert vel í kerfinu eftir öll þessi áhlaup og í gær tók ég svo ákvörðun um að chilla aðeins í rauða kjötinu í nokkra daga og taka út hvítt hveiti og sykur í amk mánuð. Nokkrum mínútum eftir að ég hef nelgt þessa ákvörðun niður er mér boðið í barnaafmæli næstu helgi. Stuttu síðar var mér boðið í annað barnaafmæli.. líka næstu helgi.

Hverjar haldið þið að séu líkurnar á afmælum sem eru laus við hvítt hveiti og sykur? Heh. Hélt það :) Ég er eiginlega að íhuga að vera bara dónaleg og sleppa því að meðvirknisborða, svona svo ég geti látið betur reyna á þessa tilraun hjá mér.

3.1.12

Eitt pósk á dag

Ég er að spá í að skrifa eitt pósk á dag amk það sem eftir lifir af þessum mánuði. Þetta er pósk dagsins í dag.


Nei djók. Ætla alveg að segja eitthvað meira.

Hafið þið tekið eftir því hvað Íslendigar eru rosalega uppteknir af því þegar einhver sem er ekki Íslendingur talar um Ísland (hvað eru mörg Ísl í því?). Núna eru t.d. allir að pósta þessu myndbandi á facebook.



Ekki það að það séu ekki til maaaargir, margir verri hlutir til að pósta en QI. Stundum koma líka fréttir á mbl eða eitthvað innihaldi í ætt við "Einhver eldri kona sem býr í Winnipeg í Kanada og heldur ferðablogg skrifaði að það væru góðar pulsur á ÍSLANDI".  Seinna í fréttinni stendur eitthvað í líkingu við að hún hafi lýst því yfir að það eina sem hún hafði út á landið að setja væri lélegar almenningssamgöngur. Svo ef það er kíkt á linkinn á bloggið hjá gömlu konunni er allt í einu allt morandi í kommentum frá Íslensku fólki, annað hvort á íslensku og í líkingu við "ÍSLAND ER BEST!!!!!!!!" eða fólk að rakka gömlu konuna niður fyrir að dissa Ísland (lesist: almenningssamöngur á ÍSLANDI) þrátt fyrir að viðkomandi hafi örugglega biddsjað yfir strætó á hverjum degi síðan hann/hún hafði aldur til að biddsja.

Ókay.. Það er engin gömul kona svo ég viti til, frekar en það er skeið. Þetta er bara einfölduð dæmisaga sem sýnir hvað ég á við þrátt fyrir að vera röng á allan hátt.

Litla barnið vaknað... hef ekki tíma til að edita. Gott á ykkur! :)